Qostanaı oblysynyń mektepterinde JRVI, tumaý juqtyrǵan balalar kóbeıip ketti. Tumaýdyń oqýshylar arasynda keń taraýyna baılanysty Altynsarın aýdanyndaǵy Sılantev, Sverdlov aýylynyń mektepteri tolyqtaı qashyqtan oqý tártibine kóshti, dep habarlaıdy Egemen.kz.
Oblystyq bilim basqarmasynyń málimetinshe, 20 qarashadan bastap Qostanaı, Rýdnyı qalalary men Altynsarın, Qostanaı aýdandarynda 29 mekteptiń jekelegen synyptary da qashyqtan oqı bastaǵan.
Búginde óńirde 5 634 oqýshy qashyqtan bilim alyp jatyr. Onyń 2 274-i – 1-4 synypta, 3360-y 5-11 synypta oqıdy.
Bilim ordalarynda juqpaly vırýstyń taralyp ketýine ata-analar da alańdaýly. Biraz ata-ana mundaı jaǵdaıda oqý mekemeleriniń tolyqtaı qashyqtan oqý rejimine kóshkenin durys kóredi. Al oblystyq bilim basqarmasy basshysynyń orynbasary Danagúl Súıindikova mektepterdiń tolyqtaı qashyqtan oqytý tártibine kóshýi bas sanıtarlyq dárigerdiń qaýlysymen ǵana qabyldanatyn sheshim ekenin aıtady.
Sanepıdbaqylaý departamentiniń málimetinshe, 1 qazan men 18 qarasha aralyǵynda óńirde JRVI juqtyrǵan 36 myńnan asa adam tirkelgen. Onyń 21 myńy – 14 jasqa deıingi balalar.
О́ńirde tumaýdyń órship bara jatqanyna baılanysty oblystyq balalar aýrýhanasy da kúsheıtilgen jumys tártibine kóshti. Emdeý mekemesi naýqastardyń syrtqa shyǵýyna, olardyń ata-analary men týystarynyń ǵımaratqa kirýine tyıym saldy.